طريقة تحضير الصمصة بأنواعها.. صمصة فاكية وجلجلان بخطوات بسيطة
Mفارس
تحب تحضر أبن صمصة تونسية على أصولها، ليوم في موقع صحتي بوست، باش نقدملكم طريقة تحضير الصمصة بأنواعها وبطرق مختلفة، وأهم طريقة سألتوني عليها برشا مرات هي الصمصة في الفرن بدون زيت. أيا مالا ركز معانا وخلينا نبداو بصمصة الجلجلان المقلية وبعد نتعداو للصمصة في الفرن. وما تنساش بعد ما تقرأ الخطوات لكل تتفرج في الفيديو باش يزيد يوضحلك أكثر الطريقة.
الصمصة التونسية بالجلجلان
من أحسن وصفات الصمصة الزمنية الي يطلبوها العباد هي صمصة بالجلجلان خاطرها بنينة برشا و زيد اقتصادية علخر. ومدام رمضان جاء لازمنا حاجة خفيفة و بنينة نحليو بيها السهرية. على هاك باش نقدملكم طريقة تحضير زوز أنواع من صمصة الجلجلان باش كل مرة اطيب نوع.
صمصة بالجلجلان والكاكاوية
باش تحضر صمصة بالجلجلان والكاكاوية تحتاج للمكونات والمقادير التالية:- 300غ جلجلان
- 150غ كاكاوية
- 50غ لوز مهروش
- 50غ زبدة عربي
- كاس صغير ماء ورد
- أوراق ملسوقة
أما طريقة تحضير صمصة الجلجلان والكاكاوية فهي عبر الخطوات التالية:
- ارحي الجلجلان رحية خفيفة باش ما تخليهوش يسيب زيتو و يشيح.
- ارحي الكاكاوية كيف كيف رحية خفيفة وخلطهم مع بعضهم وزيدهم اللوز المهروش.
- صب عليهم ماء الورد والزبدة الذائبة بشوية وخلط حتى تتحصلين على عجينة متماسكة.
- خليها ترتاح وامشي قص الملسوقة مستطيلات متساوية.
- كل كعبة ملسوقة نقصوها بالطول لأربعة أو خمسة مستطيلات، انت والحجم الي تحب عليه.
- بعد القصان ادهن كل مستطيل مليح بالزبدة وابدأ عمرو بالخليط الي حضرناه.
- كل مستطيل حطلو مغرفة حشو على الحاشية متاعو، وابدأ لفو في شكل مثلث.
- بعد ما تكمل اللفان ادهن المثلث من الطرف متاعو بشوية زبدة أو بيض باش تلصق كعبة الصمصة في بعضها وما تتحلش.
- عبي المقلاة بالزيت وشعل عليها النار وخليها حتى يسخن الزيت.
- حط كعبات الصمصة الي حضرتهم في الزيت السخون وخليهم يطيبو حتى يأخذو اللون الأحمر.
- أخيرا خرجهم و شحرهم مليح ورش عليهم شوية جلجلان كعب بعد الشحور.
طريقة تحضير شحور الصمصة تلقاوها مكتوبة في العنصر الموالي.
شاهدي أيضا: بسيسة الشعير على الطريقة الساحلية
شاهدي أيضا: بسيسة الشعير على الطريقة الساحلية
صمصة بالجلجلان واللوز
باش نحضرو صمصة الجلجلان واللوز يكفي نعوضو الكاكاوية باللوز و نتبعو نفس الخطوات(يعني نحطو 200غ لوز و300غ جلجلان). وتنجم تنوع في حشو الصمصة كيما تحب انت. وبالنسبة للشحور باش نحضروه لازمنا المكونات هذي:- كاسين سكر
- كاس ماء
- مغرفتين قارص
بعد ما تعرفنا على طريقة تحضير الصمصة المقلية باش نمرو الآن لطريقة إعدادها في الفرن، وهذي الطريقة الي برشا منكم طلبوها خاطرها صحية أكثر وبلاش زيوت. فتبعو معانا العنصر الموالي باش تلقاو فيه كل الأسرار الي تخلي صمصة الفرن تنجح وتجي بنينة علخر وفي شكل جميل.
صمصة في الفرن
صمصة الفرن هي وحدة من طرق إعداد الصمصة بشكل صحي وذلك عبر طبخها في الفرن عوض قليها تجنبا للزيوت الغير صحية الي تنتج على القلي و أيضا من أجل تقليل نسبة السعرات فيها. ويمكن إعداد الصمصة في فرن المنزل بسهولة. و باش تبينلك الوصفات التالية طريقة عمل بعض أنواع الصمصة و طهيها في الفور بخطوات بسيطة.
صمصة جلجلان في الفرن
يمكن إعداد صمصة الجلجلان في الفرن بدون قلي مع الحفاظ على طعمها الأصلي المميز. ولتحضير صمصة جلجلان في الفرن نحتاج إلى المقادير التالية:- 300 غ جلجلان
- 100غ فاكية مهروشة(أي نوع تحب عليه).
- 100 غ سكر ناعم
- 10 ورقات ملسوقة مربعة (مش دياري)
- 50 غ زبدة طبيعية
- 5 ملاعق ماء ورد
- بيضة
وباش تحضر صمصة جلجلان بنينة يكفي اتبع الخطوات التالية:
- حمر الجلجلان و ارحيه.
- ضيف الفاكية المهروشة
- ضيف السكر ثم ماء الورد للخليط تدريجيا وامزج المكونات حتى تتماسك مع بعضها.
- حول الخليط الي تحصلت عليه إلى شكل كويرات صغيرة.
- قطع ورقات الملسوقة إلى شرائح مستطيلة الشكل ثم ادهنها بالزبدة العربي بعد إذابتها.
- حط كويرة من الجلجلان في طرف المستطيل ثم تبدا تلف حتى التحصل على مثلث.
- أغلقي المثلث الي تحصلت عليه بالقليل من البيض.
- واصل بنفس الطريقة حتى تكمل باقي الكمية.
- حط مثلثات الصمصة في طبق وضعيه في الفرن الساخن، وخليهم يطيبو مدة 8 دقائق حتى تكتسب الصمصة اللون الذهبي.
أخيرا تخرجها وتصب عليها الشحور الي لازمو يكون بارد مش سخون.(طريقة إعداد الشحور موجودة في آخر المقال).
صمصة اللوز من أحسن أنواع الصمصة من ناحية البنة والمنفعة. وباش تزيد في منفعتها مالأحسن اطيبها في الفور بدون زيت. و باش تحضر صمصة باللوز في الفرن نحتاج المقادير التالية:
طريقة التحضير:
صمصة باللوز في الفرن
- 400غ لوز محمر
- 150غ زبدة طرية
- 2 مغارف كبار سكر محور
- عطرشية
- 10 اوراق ملسوقة صمصة
طريقة التحضير:
- تحمر اللوز وترحيه و تزيدو السكر المحور وشوية عطرشية وزبدة ذائبة وتخلط حتى تتحصل على عجينة متماسكة.
- تقسم عجينة اللوز كعبورات صغار وتقص أوراق الملسوقة على اربعة بالطول.
- تاخو كل قطعة ملسوقة و تدهنها بالزبدة من الشيرتين.
- تحط الحشو و تطويها على شكل مثلث و تسكر اخر الحرف بابيض عضمة
- ترصف كعبات الصمصة في طبق و تدخل للفور في 180 درجة مدة 10 دقائق.
- و تخرجها و هي سخونة تسقيها بالشحور البارد وبالشفاء.
صمصة تونسية مطبخ ألفة
باش نقدملكم في العنصر هذا طريقة تحضير صمصة بالفاكية على طريقة ألفة وبخطوات بسيطة وساهلة. وباش نقدمولك معاها فيديو باش يبينلك أكثر بالصوت والصورة الطريقة الصحيحة لتحضير الصمصة من مطبخ ألفة .
صمصة بالفاكية
مكونات صمصة الفاكية من مطبخ ألفة:- باكو ملسوقة مربعة
- رطل فاكية مرحية مهروشة(لوز، بوفريوة، فستق، كاكوية، جلجلان...)
- 150غ سكر محور
- 200غ زبدة طبيعية
- شوية ماء عطرشية
طريقة تحضير الصمصة
طريقة تحضير الصمصة من مطبخ ألفة تمرّ عبر المراحل التالية:
- خلط الفاكية مليح مبعضها و ذوب الزبدة و صبها عليها بالشوية وحرّك.
- واصل في صبان الزبدة تدريجيا و خلط لين تتلم الفاكية مبعضها.
- زيدها العطرشية وواصل في الخلط لين يولي خليط الفاكية مثل العجينة.
- بعد ابدا في قصان الملسوقة في شكل مستطيلات صغار عرض كل مستطيل 5 أو 6 صم.
- بعد ما قصيتها ادهنها بالزبدة الذايبة الي بقاتلنا بواسطة فرشاة.
- كعبر عجينة الفاكية المهروشة وحط كل كعبورة في طرف المستطيل اللي قسيناه (كل كعبورة توزن حكاية 15غرام).
- لف الملسوقة على كعبورة الفاكية في شكل مثلث و ننزل عليها بشوية بصوابعي و أنا نلف فيها باش تتوزع على الكعبة لكل.
- كيف نكملو الكعبات لكل ندخلوهم للفور لين نتحصل على اللون الذهبي والا نقلوهم في الزيت، إذا تحبهم مقليين بالطريقة الأصلية متع الصمصة.
شحور الصمصة
باش نحضرو شحور صمصة ناجح و يكفي كمية الصمصة الي حضرناها لازمنا المقادير التالية:- رطل سكر
- ربع ليتر ماء
- 3 مغارف قارص
- حط السكر في وعاء
- زيدو كمية الماء حتى يغطي السكر وابدأ حرك حتى يذوب السكر.
- حط الوعاء على نار هادئة حتى يغلي.
- أضيفي له عصير الليمون وابدأ حرك حتى يتماسك الخليط نوعا ما.
- وقت يعقاد الخليط شوية ويولي خاثر اطفي النار وخليه حتى يبرد في عقلو.
أخيرا، حاول دائما ركز على طريقة لف الصمصة ، حتى تتحصلين على صمصة مزيانة وناجحة. واذا كنت تحتاجين إلى وصفات أخرى يمكنك زيارة قسم "أكلات و وجبات صحية" وستجدين فيه عدة وصفات تونسية سهلة ورائعة.
شاهدي أيضا: وصفة الكمونية التونسية على أصولها