صمصة باللوز خفيفة وتتقرمش
صمصة باللوز هي أحسن وصفات الصمصة الي نحبو نطيبوهم في الدار وخاصة في شهر رمضان. والصمصة ما تكون بنينة كان ما تكون خفيفة وتتقرمش. فإذا تحب تعمل صمصة مهروشة وتتڨرمش ما عليك كان تبع المقال للآخر. خاطر باش تلقى فيه أسرار ماكش باش تلقاهم في حتى بلاصة أخرى.
صمصة باللوز
بعد ما قدمتلكم في المقال السابق خطوات تحضير وصفة الصمصة بطرق مختلفة، باش نقدملكم توة وصفة الصمصة باللوز . وباش نقدملكم معاها نصايح باش تنجم تجيك مڨرمشة مش طرية. خاطر كيما نعرفو بنة الصمصة في تڨرميشتها وخفتها. أيا مالا نبداو بالمكونات وبعد نتعداو لطريقة التحضير.
مكونات صمصة اللوز
- رطل لوز مقلي ومهروش
- 200 زبدة مذوبة
- 3 مغارف سكر محور
- ماء ورد
- 12 ورقة ملسوقة باكوات
طريقة تحضير صمصة اللوز
- حمر اللوز و هروشو
- زيدو سكر محور و رشة ماء ورد
- ذوب الزبدة حتى يتنحى الحليب منها
- قص أوراق الملسوقة كل ورقة على اربعة بالطول و تاخو كل ترونش تدهنها بالزبدة من الجيهتين.
- حط الحشو في الترونش متاعك و تطويها على شكل مثلث و تسكر اخر الحرف بأبيض العضمة
- كمل الترونشات الكل الي قصيتهم بنفس الطريقة وبعد رصفهم في الطبق.
- دخلهم لفرن سخون مدة دجين لين على 180 درجة حتى يحمارو. وتنجم تقليهم إذا تحب الصمصة مقلية.
- خرجها وهي سخونة واسقيها بشحور بارد.
أسرار الصمصة
باش تجيك الصمصة تتڨرمش وبنينة كيما تحبها، لازم الفاكية تكون مهروشة مش عجينة معصدة علخر. ولازم كيف تشحرها يكون الشحور بارد مش سخون. ولازم ورقة الملسوقة تكون طويلة شوية، يعني كعبة الصمصة تكون فيها برشا طبقات متع ملسوقة مش طبقتين ولا ثلاثة كهو.
أخيرا ان شاء الله تكون النصائح هذه فاداتك وتعمل أبن صمصة. إذا تحب وصفات أخرين أدخل لقسم أكلات و وجبات صحية واختار الوصفة الي تعجبك.