مكونات اليويو التونسي هشوش و طريقة تحضيره خطوة بخطوة
Mفارس
اليويو من أشهى وألذ الحلويات التونسية الشعبية، الي تعلقنا بيها مالصغرة وحبيناها، على هذاك باش نقدملكم اليوم مكونات اليويو و طريقة تحضيره بخطوات بسيطة وساهلة باش تنجم تعمل أبن يويو تونسي هشوش وخفيف في دارك.
يويو هشوش بالياغورت
برشا يسئلو كيفاش ينجمو يعملو يويو هشوش بالياغورت ، و النوع هذا هو من أنواع اليويو الخفيف الي تشهر برشا الفترة لخرى خاطرو بنين علخر ويجي مهشهش . على هاك باش نقدملكم روسات اليويو هذا و باش نعطيكم كيفية التحضير خطوة بخطوة، أيا مالا خلينا نبداو نتعرفو على المكونات .
مكونات اليويو
مقادير اليويو الي باش نقدموها هي متع كمية صغيرة، الي يحب يعمل أكثر ينجم يزيد في المقادير بطريقة مضبوطة.
المكونات :
- رطل فارينة
- 3 بيضات
- 3 مغارف كبار سكر
- 1 ياغورت طبيعي
- 1 كيلة زيت
- 1 كيلة حليب
- باكو سكر فانيليا
- باكو خميرة قاطو
- زيت للقلي
وبالنسبة لشحور اليويو نحتاج للمكونات هذي:
- 2 كيسان سكر
- 2 كأس ماؤ
- عصير نصف ليمونة
بالنسبة للزيت و الحليب تكيل بحكة الياغورتة الفارغة.
بعد ما تعرفنا على المقادير خلينا نتعداو توة لطريقة اعداد اليويو .
طريقة تحضير اليويو
يمكن تحضير اليويو التونسي عبر الخطوات التالية:- اركض السكر و البيض مليح
- زيدهم سكر الفانيليا و الياغورت و الحليب و الزيت و خلط المكونات لكل مليح مبعضهم
- أبدا زيد الفارينة و الخميرة بالشوية مع التحريك المتواصل حتى تتحصل على عجينة طرية و تتلصق
- غطيها و خليها ترتاح ربع ساعة
- خوذ العجينة ورش عليها شوية فارينة(حكاية 50 غرام) و اعجنها شوية
- حلها بالقلقال و شكلها في شكل دور اليويو الي نعرفوهم (تنجم تستعمل كاس متوسط و فم دبوزة ماء باش تشكل بيهم كعبة اليويو المدورة)
- عبي مقلاة غارقة بالزيت وحطها تسخن
- اقلي اليويو في الزيت السخون على نار متوسطة مع التقليب المستمر حتى ياخو اللون الذهبي
بالنسبة لطريقة تحضير شحور اليويو فهي عبر الخطوات هذي:
- حط الماء و السكر و عصرة القارص في طنجرة صغيرة
- شعل عليهم الغاز وخليهم يطيبو
- وقت يغلي احسب 15 دق واطفي النار
- شحر اليويو متاعك وصحة وبالشفاء. تنجم زادا تزين اليويو بالجلجلان ولا بفاكية مرحبا مع ما تشحرو باش ياخو منظر أحلى.
كانت هذه طريقة إعداد يويو تونسي هشوش بالياغورت ، وإذا تحتاج وصفات أخرين بخلاف وصفة اليويو ، تنجم تلوج في ڨوڨل على موقع صحتي بوست الي تلقى فيه أي وصفة تحب عليها.
شاهدي أيضا: صمصة باللوز خفيفة وتتقرمش